`

قانون دور العبادة الموحد الجديد .. الغريب .. المريب

دور عبادة (صورة ارشيفيه)
دور عبادة (صورة ارشيفيه)
قرأت فى جريدة اليوم السابع موضوع عن "مشروع قانون دور العبادة الموحد الصادر من المجلس العسكري"، واستغربت بعض بنود القانون اللي تقريبا ملهاش صله بطبيعة اهل مصر المادية والدينية ومن ضمن البنود أن الفرق بين دار العبادة والأخرى ألف متر بمعنى كيلو متر بين الجامع أو الكنيسة وما يمثلها وهنا اتصدمت، طيب فى طوائف بتصلي مرة فى الأسبوع فى دار العبادة وبتكون يوم الاحد (الصلاة الجمهورية) أو الأعياد وطائفة تانية بتصلي خمس مرات فى اليوم بلاش ده.

أنا ساكن فى منطقة شعبية مليانه ناس فى شارع طوله 300 متر وفيه 3 جوامع، وفى صلاة المغرب والعشاء مبيكونش فى مكان فى أى جامع على شان أصلى بمعنى أن 3 جوامع فى 300 متر لا تكفي، نقوم معدلين القانون ونقول جامع كل كيلو متر ازاى يعنى!!

بلاش ده أنا شاب و استحمل طيب عم عبده اللي مغير شريان فى القلب يطلع الظهر من البيت يصلى ويرجع بعد صلاة العشاء على شان المشوار!!!

المهم استمريت فى القراءة، ولقيت بند تانى غريب إن ممنوع بناء دور العبادة أسفل أو أعلى العمارات السكنية ودي كانت الصدمة الثانية يعنى أنا ابني جامع واقعد فى الشارع أنا والعيال وبمعنى تانى يعنى الناس تصلى ومتسكنش ولا تسكن و متصليش؟؟!!

الغريب فى البند إن فى مناطق شعبية كتيرة مفيهاش جوامع على مساحة مخصصة ليها لأن الناس مش معاها فلوس تعمل كده إلا فى حالة وجود فاعل خير، وده نادر لما بتلاقى جامع مبني بواسطة فاعل خير على أرض مخصصة، وبعد تعديل القانون يبقى محتاجين فاعلين خير كتير جدًا لأن بناء جامع أسفل عمارة سكنية مابيكلفش البانى أكتر من 20 الف تقريبًا لكن فى حالة القانون الجديد يبقى محتاج على الأقل من 150 الف إلى مليون جنيه لبناء جامع حسب حجمه.

وفى نفس المادة أن يشترط بناء دور أرضى يخصص لمزاولة أنشطة خدمية لدور العبادة ومحل إقامة لمقيمى الشعائر يعنى الكنيسة زى كنيسة إمبابة، اللي تم ترميمها فى أحداث امبابة وكل الناس شافتها وشافت حجمها قد أيه من أدوار أو مسجد فيه مستوصف ودار ايتام وخلافه كل ده هيكون مصيره أيه؟

طيب أيه ظروف دور العبادة مثل فى الجامعة والمدن الجامعية يعنى هيكون فى كنيسة و جامع ولا جامع فقط.

أنا شايف إني أعدل القانون الخاص ببناء دور العبادة لغير المسلمين بما يناسبهم وميكبتش حرية التعبد وارفع عنهم المعاناة الخاصة ببناء دور العبادة

لكن بعد قانون دور العبادة الجديد كده بقى فى مساواة فى المعاناة اللي هيعانيها المسلمين والمسيحين لبناء دور عبادة.

يعنى مثل فى منطقة السكنيه المفهاش قطعة ارض فاضيه مين هيشترى عمارة ويهدها على شان يبنى كنيسه او جامع ومن الممكن انه يشترى دور او اثنين فى عمارة سكنيه لبنا جامع او كنيسه

كل الاقدر اقولها ان الشيطان بيشكركم على حسن تعونكم ومن انهاردة مافيش صلاة فى الجامع على شان مبقاش فى جامع وكله يعمل حجرة فى البيت و يقول لجرانه وقت الصلاة تعال شرفونى ونصلى جماعة ومن المحتمل تلاقى واحد بياخد تاكسى على شان يروح الجامع او تلاقى ميكروباص بينادى الجامع الجامع واكيد هنلاقى فى كل منطقة محطه اسمها محطة الجامع

بعتزر لو معلوماتى عن القانو خطاء وبطلب بمحاسبة جريدة اليوم السابع فى هذه الحالة

مع تحيات مواطن جاهل

تعليقات الفيسبوك